1 Samuel 13
1 掃羅登基做王个時三十歲，佢做以色列王兩年。
2 掃羅對以色列人當中選出三千人，將兩千人留在佢身邊，在密抹㧯伯特利山區，將另外一千人派到便雅憫支族个基比亞所在，俾佢个孻仔約拿單帶領。掃羅吩咐其他个人轉屋下。
3 約拿單在迦巴攻打非利士人个駐防營；非利士人全部聽到這事。掃羅派專人到全國各地，歕羊角召集希伯來人出來相㓾。
4 所有个以色列人聽到掃羅攻打非利士人个駐防營，又聽講非利士人怨恨佢等，就響應掃羅个呼召，集合在吉甲。
5 非利士人聚集攻打以色列人。佢等有三萬戰車、六千騎兵，㧯盡多个步兵，多到像海滣个沙仔恁多。佢等將部隊調到伯‧亞文東片个密抹，在該位安營。
6 以色列人看到強敵來到、知大難臨頭，有兜人就去囥在山孔肚、樹林肚、石窿肚、井肚抑係坑窟肚；
7 有兜希伯來人過約旦河，逃到迦得㧯基列地區去。掃羅還在吉甲，跈佢个人全部驚到緊顫。
8 佢照撒母耳个指示，在吉甲等七日，總係撒母耳還吂到。人民開始離開掃羅散掉去，
9 所以掃羅對佢等講：「將燒化祭㧯平安祭个牲儀帶到𠊎這位來！」佢就獻燒化祭。
10 佢獻祭一完成，撒母耳就到。掃羅出去迎接佢，愛㧯佢請安，
11 總係撒母耳責備佢：「你做麼介事呢？」掃羅講：「人民離開𠊎散掉去，你乜無照約好个時間來，再講，非利士人又聚集在密抹。
12 𠊎想，非利士人愛在吉甲攻擊𠊎，𠊎還吂得到上主个看顧，所以𠊎無奈何自家就去獻祭。」
13 撒母耳對掃羅講：「你樣般恁糊塗！你樣般無遵守上主—你上帝給你个命令？若係你遵守，上主會使你㧯你个後代永遠統治以色列。
14 這下，你个王位毋會長久，因為你無聽從佢。上主愛尋合佢心意个人，立佢做佢子民个統治者。」
15 然後，撒母耳離開吉甲，繼續佢个行程。其他个人民跈掃羅，去㧯佢个部隊會合。佢等對吉甲到便雅憫地區个基比亞。掃羅算佢个部隊，大約有六百人。
16 掃羅㧯佢个孻仔約拿單，還有跈佢等个人，在便雅憫地區个迦巴安營；非利士人在密抹安營。
17 非利士个軍隊對營地分三隊出來攻擊：一隊向書亞地區个俄弗拉去，
18 一隊向伯‧和崙去，另外一隊在洗波音山壢个對面往曠野个山肚去。
19 該時，以色列全地無打鐵師傅，因為非利士人毋俾希伯來人製造刀劍抑係槍。
20 (以色列人愛尋非利士人來磨犁仔、钁頭、斧頭、鐮仔。
21 磨斧頭㧯逐牛个刺棍愛一隻細銅錢；磨犁仔㧯钁頭就愛兩隻銅錢。)
22 所以，相㓾个時，除了掃羅㧯厥孻仔約拿單以外，以色列軍隊無一個士兵有刀劍抑係槍。
23 非利士人派一隊駐防兵去掌等密抹出入个路口。